Skip to main content
All Posts By

maggegg

Vitnisburður Vinar í bata – febrúar 2022

Með Reynslusögur

47 ára kvenkyns

Hvernig var lífið áður en þú fórst í sporin?
Ég hef alla tíð reynt að gera mitt allra besta og standa mig extra vel í öllu, auðvitað með misjöfnun árangri þó. Ég var alla tíð góður nemandi, þæg og hlýðin dóttir, frændrækin mjög, umhyggjusöm og tilbúin að aðstoða alla. Sjálfstæð um of og dugleg, ósérhlífin og vinnusöm. Svo mjög að ég setti ekki skýr mörk um hvað ég vildi eða gat þolað í samskiptum við fólk. Flækti mér í málefni annarra og tók á mig ábyrgð á alls konar hlutum sem voru alls ekki mín ábyrgð sem endaði oft með mikilli vanlíðan og tilfinningu um að vera ekki nóg – ég var aldrei nóg. Ég var aldrei nógu dugleg, nógu snjöll, nógu sniðug, nógu sterk, nógu fljót, nógu falleg, nógu skemmtileg….. aldrei nóg.

Var fólk að koma upp að mér og segja mér að ég væri ekki að standa mig nógu vel gætuð þið spurt? … nei nei það var ekki svo…. Yfirleitt þvert á móti var mér hrósað fyrir einmitt allt þetta sem ég taldi upp hér að ofan. Þetta voru mínar eigin ranghugmyndir byggðar á upplifun minni á því hvernig fólk sæi mig og ég leitaðist eftir viðurkenningu umhverfisins með skaðlegum hætti fyrir sjálfið mitt. Því einhverra hluta vegna fylgdi skömmin mér eins og skugginn ef mér fannst ég ekki standa mig nógu vel eða mér fannst ég hafa átt að vita betur í einhverjum aðstæðum og samskiptum. Ég grínaðist oft með það hér áður að ég væri með 5 háskólagráður í samviskubiti!… mér finnst það ekkert fyndið í dag, þegar ég skil afleiðingar þess.

Þau skipti sem ég var stolt af sjálfri mér og árangri í einhverju sem vel hafði tekist til – gat ég samt ekki leyft mér að njóta þess og dvalið í stoltinu – mér fannst ég ekki eiga það skilið að gleðjast eða láta á því bera að ég væri stolt. Því þá væri ég montin og hvað myndi nú fólk segja yfir því?

Hvað gerðist til að þess að þú tókst skrefið?
Það var svo fyrir ca. 4 árum síðan að mér fannst ég klessa á vegg. Ég veit að margir á mínum aldri upplifa einhvers konar tímamót, kulnun eða vakningu á þessum árum. Ég var einhvern veginn búin að mála mig út í horn í samskiptum, lofa upp í ermina á mér, vera ekki hreinskilin við sjálfa mig né samferðafólk um verkefnastöðuna mína og hve lítinn frítíma ég ætlaði sjálfri mér. Ég átti mér hvort eð er engin áhugamál og vissi ekki hvað annað ég ætti að gera en að vinna meira, sinna fleiri sjálfboðaliðastörfum eða annað slíkt. Ég hef bæði verið alltof þolgóð og dugleg mjög lengi sem er ekki góð blanda, því með því bað ég sjaldan eða aldrei um aðstoð þó ég væri að drukkna trekk í trekk. Mér fannst oft pínu óeðlilegt og sorglegt að eiga mér engin áhugamál og spurði oft vini og fjölskyldu, hvaða áhugamál gæti verið hentugt fyrir mig. Þau spurðu þá oft á móti, hvað langar þig, hverju hefurðu áhuga á?… það sorlega er að ég hafði ekki hugmynd um það. Svo aftengd var ég orðin eigin löngunum og þrám.

Ég var búin að lesa ýmislegt um meðvirkni og afleiðingar hennar ásamt því að fara á námskeið hjá Lausninni. Ég var búin að átta mig á að meðvirknin var orðinn ríkjandi þáttur í mínu fari sem að hamlaði mér og stuðlaði að mikilli vanlíðan og þar með litaði ástandið líka líðan þeirra sem standa mér næst. Þrátt fyrir að vera búin að kynna mér efnið töluvert og sækja námskeið, þá vissi ég ekki hvernig ég kæmist út úr þessu né skildi ég fyllilega hve djúpar ræturnar voru né hvar – hvenær og hvernig þær mynduðust í mínu tilfelli. Og þegar maður skilur það ekki þá getur maður ekki tekist á við brestina sína og ekki breytt og bætt hegðunarmynstrið sitt.

Hvernig er lífið núna í sporunum/eftir sporin?
Sporavinnan hefur svo sannarlega breytt mínu lífi og er orðin eitt mesta og besta verkfærið sem ég á í verkfærakistunni minni til sjálfseflingar. Ég öðlaðist í fyrsta sinn sanna sjálfsmildi og sjálfsfyrirgefningu eftir fyrsta hringinn. Ég náði loks að sætta mig við að vera fullkomlega ófullkomin manneskja með bæði fullt af göllum en líka fullt af kostum. Ég skil núna miklu betur hvernig, hvar og hvenær ákveðnir þættir í uppvextinum hafa valdið því að ég hef staðnað, tilfinningalega í viðbrögðum mínum við fólki og atburðum, eins og ég sé aftur komin til baka til þess tíma þegar ég var lítil og kunni ekki aðrar leiðir til að takast á við erfiðleika og mótlæti. Með því að ná þessum skilningi í því örugga og kærleiksríka umhverfi sem vinnan í fjölskylduhópnum er þá náði ég loks dýrmætum bata sem ég þakka Guði fyrir og góðu englunum hans sem ég er svo lánsöm að hafa í lífi mínu.

Þvílík blessun!

Fræðsluþættir um Tólf sporin

Með Fréttir

Við viljum vekja athygli á útvarpsþáttunum um Tólf sporin. Góð kynning á starfinu.

Það verður aftur farið að útvarpa Tólf spora þáttunum á Lindinni – sá fyrsti verður fimmtudaginn 1. september 2022 og svo vikulega í framhaldi.

Á Útvarpsstöðvarinni Lindin er hægt að nálgast app Lindarinnar og þá er hægt að hlusta á allt mögulegt í símanum.

Við getum líka fundið og hlustað á Tólf spora þættina með því að smella á slóðina hér fyrir neðan:

Útvarpsþættir á Lindinni

Sumarkveðja

Með Fréttir

Nú er venjulegu sporastarfi væntanlega lokið á flestum stöðum. Allir komnir í sumarskap og farnir að vinna í garðinum sínum eða huga að ferðalögum.

Batinn er samt eitthvað sem við þurfum stöðugt að vinna að og finna okkar eigin leið til að halda okkar striki þó að hópastarfið sé ekki í gangi.

Það er auðvitað hægt að lesa tólf spora efni. Svo eru það viðhaldssporin: 10. sporið þar sem við tökum reglulega úttekt.  11. sporið þar sem við leitum eftir nálægð Guðs og hlustum eftir vilja hans. Loks 12. sporið þar sem við segjum öðrum frá því hvað sporin hafa gert í lífi okkar. Það staðfestir bata okkar og minnir okkur á hvernig lífið var, hvað gerðist og hvernig lífið breyttist við það að tileinka okkur sporin.

Hafið það gott í sumrinu og við minnum á að á heimasíðunni verður auglýst þegar nýjar byrjanir fara í gang í haust.

 

Aðalfundur vina í bata og batamessa 6. mars í Lindakirkju

Með Fréttir

Aðalfundur Vina í bata verður haldinn í Lindakirkju sunnudaginn 6. mars kl. 16.00
Við sem kunnum vel að meta sporastarfið mætum vel á aðalfundinn og tökum þátt í starfinu.

Dagskrá:

  1. Fundur settur – kosinn fundarstjóri og fundarritari
  2. Skýrsla starfshóps
  3. Ársreikningar
  4. Kosning í starfshópinn og skoðunarmenn
  5. Önnur mál

Kl. 17.00 eða í beinu framhaldi verður Batamessa í Lindakirkju

Allir eru velkomnir í batamessu

Batamessa nóvember í Grensáskirkju 7. nóv. kl. 17.00

Með Fréttir

Batamessa í nóvember
Batamessa nóvembermánaðar verður í Grensáskirkju sunnudaginn 7. nóvember n.k. kl. 17.00. Batamessurnar eru gott tækifæri fyrir okkur til að iðka 11. sporið og til að hitta aðra vini í bata. Þetta er líka kjörið tækifæri til að bjóða fólki með til að kynna fyrir því hvað sporastarfið stendur fyrir. Vinir í bata í Grensáskirkju taka alltaf vel á móti okkur og við hvetjum ykkur til að koma og finna hvað þetta eru góðar stundir.

Enn er opið á þessum stöðum:

Í Selfosskirkju
er enn opið. Starfið er á mánudögum kl. 18.00.
Síðasti opni fundurinn er mánudaginn 1. nóvember.

Í Safnaðarheimili Lágafellskirkju, Þverholti 3, Mosfellsbæ er enn opið.
Starfið er á miðvikudögum kl. 19.30
Síðasti opni fundurinn er miðvikudaginn 27. október.

Í Safnaðarheimili Bessastaðakirkju, Brekkuskógum 1, Álftanesi, er enn opið.
Starfið er á miðvikudögum kl. 20.00
Síðasti opni fundurinn er miðvikudaginn 27. október.

Batamessa sunnudaginn 3. október kl. 14.00

Með Fréttir

Fyrsta batamessa haustsins 2021 verður í Garðakirkju á Garðaholti, sunnudaginn 3. október n.k. kl. 14.00
ATH breyttan messutíma.

Við heyrum vitnisburð Vinar í bata

Sr. Sveinbjörn R Einarsson  flytur okkur eitthvað gott til að taka með okkur út í daginn.

Að messu lokinni verður kaffihressing í hlöðunni á Króki á Garðaholti

Komum og njótum þess að hittast og koma okkur í sporagírinn

Bjóðum vinum með okkur sem vilja kynna sér sporin

Sjáumst í batamessu

Starfshópurinn

Batamessan í apríl verður í Kirkju Óháða safnaðarins

Með Fréttir

Vinir í bata í Óháða söfnuðinum og sr. Pétur bjóða ykkur til Batamessu í Kirkju Óháða safnaðarins, sunnudaginn 7. apríl n.k. kl. 17.00

( vinsamlegast komið inn um aðal inngang Kirkjunnar, vegna fermingarveislu sem er í safnaðarheimilinu)

Allir eru velkomnir í batamessu – takið endilega með ykkur gesti og við gefum okkur tíma fyrir hressingu og spjall að messu lokinni.

Sjáumst í batamessu!

 

Batamessa marzmánaðar verður í Lindakirkju í Kópavogi

Með Fréttir

Það verða Vinir í bata í Lindakirkju í Kópavogi sem taka á móti okkur í batamessunni fyrsta sunnudag í marz.

Að venju verður messan kl. 17.00 síðdegis sunnudaginn 3. marz n.k.

Allir eru velkomnir í batamessu og um að gera að bjóða með sér gestum.

Batamessurnar eru vettvangur fyrir vini í bata alls staðar að til að koma saman til að iðka 11. sporið, bera saman bækur sínar og bara til að finna að við stöndum ekki ein, við erum mörg á sama ferðalaginu.

Sjáumst í batamessu.

Batamessa febrúarmánaðar verður í Bessastaðakirkju

Með Fréttir

 

Það verður batamessa sunnudaginn 3. febrúar kl. 17.00 í Bessastaðakirkju.

Allir eru velkomnir í batamessu og takið endilega með ykkur gesti.

Við heyrum vitnisburði og fáum ýmislegt gott til að taka með okkur út í daginn.

Ellen Kristjánsdóttir gleður okkur með tónlist.

Vinir í bata í Garðasókn bjóða upp á létta hressingu í safnaðarheimilinu að
Brekkuskógum 1, Álftanesi á eftir.