Það er gleðilegt að segja frá því að Óháði söfnuðurinn ætlar í vetur að bjóða upp á opna 11. spors fundi fyrir þá sem hafa farið í gegnum 12 sporin í hópi Vina í bata.
Fundirnir verða alla fimmtudaga kl. 18-19 í kirkju Óháða safnaðarins.
Athugið að fyrsti fundur verður fimmtudaginn 7. nóvember 2019.
Við hvetjum ykkur til að taka þátt í þessum fundum. Hægt er að kynna sér fundina betur hér á heimasíðunni okkar, viniribata.is/11-spors-fundir
Vinsamlegast athugið breyttar tímasetningar fundarins sem og skráningarfrest frá því sem upphaflega kom fram í fréttinni.
Nú styttist sannarlega í það að vetrarstarfið byrji hjá Vinum í bata. Við erum að fá upplýsingar frá kirkjunum um þessar mundir og munum auglýsa fundarstaði og tíma nánar í byrjun september.
Eins og leiðbeinendur og aðrir sporafarar þekkja hefur það verið gert í mörg ár að hittast að hausti í Skálholti til að byggja okkur upp og til að undirbúa okkur undir vetrarstarfið.
Að þessu sinni verður haustfundurinn með örlítið breyttu sniði. Við munum hittast í safnaðarheimili Bessastaðasóknar, Brekkuskógum 1 á Álftanesi.
Fundurinn verður haldinn laugardaginn 14. september nk. Hann hefst kl. 10 og honum lýkur kl. 15. Þátttökugjald er kr. 4.000 og er kaffi og hádegisverður innifalinn.
Dagskráin er svohljóðandi:
Kl. 10:00 – 11:45: Fundur settur. Flutt erindi um hvað felst í því að vera leiðbeinandi, fyrirspurnir og umræður í kjölfarið.
Kl. 11:45 – 12:45: Við tökum stuttan göngutúr og snæðum hádegisverð að Hliði á Álftanesi.
Kl. 12:45 – 14:30: Flutt erindi um gjafir andlega ferðalagsins í 12 sporunum, fyrirspurnir og umræður í kjölfarið.
Kl. 14:30 – 15:00: Kaffisamvera, stutt helgistund og fundarslit.
Skráning er nauðsynleg og berist sem fyrst en eigi síðar en föstudaginn 13. september fyrir kl. 16, á netfangið vinir@viniribata.is eða í gegnum skilaboð á Facebook síðunni okkar.
Við leggjum áherslu á að leiðbeinendur skrái sig til þátttöku. Við hvetjum jafnframt aðra áhugasama Vini í bata til að taka þátt því að allir reyndir sporafarar geta orðið leiðbeinendur!
Vorhátíð Vina í bata fer fram í Grindavíkurkirkju föstudaginn 10. maí kl. 18. Við hvetjum alla sporafara vetrarins til að koma og njóta samveru. Að sjálfsögðu eru eldri sporafarar og gestir velkomnir að venju! Við munum m.a. njóta tónlistar og hlýða á vitnisburði. Léttar veitingar verða á borðum.
Aðalfundur Vina í bata fer fram í Grindavíkurkirkju í kjölfar vorhátíðar, föstudaginn 10. maí. Hefst fundur kl. 19:30 og á dagskrá eru hefðbundin aðalfundarstörf.
Við hvetjum alla til að koma og taka virkan þátt í starfinu.
Kveðja,
starfshópurinn
Vinir í bata í Óháða söfnuðinum og sr. Pétur bjóða ykkur til Batamessu í Kirkju Óháða safnaðarins, sunnudaginn 7. apríl n.k. kl. 17.00
( vinsamlegast komið inn um aðal inngang Kirkjunnar, vegna fermingarveislu sem er í safnaðarheimilinu)
Allir eru velkomnir í batamessu – takið endilega með ykkur gesti og við gefum okkur tíma fyrir hressingu og spjall að messu lokinni.
Sjáumst í batamessu!
Það verða Vinir í bata í Lindakirkju í Kópavogi sem taka á móti okkur í batamessunni fyrsta sunnudag í marz.
Að venju verður messan kl. 17.00 síðdegis sunnudaginn 3. marz n.k.
Allir eru velkomnir í batamessu og um að gera að bjóða með sér gestum.
Batamessurnar eru vettvangur fyrir vini í bata alls staðar að til að koma saman til að iðka 11. sporið, bera saman bækur sínar og bara til að finna að við stöndum ekki ein, við erum mörg á sama ferðalaginu.
Sjáumst í batamessu.
Það verður batamessa sunnudaginn 3. febrúar kl. 17.00 í Bessastaðakirkju.
Allir eru velkomnir í batamessu og takið endilega með ykkur gesti.
Við heyrum vitnisburði og fáum ýmislegt gott til að taka með okkur út í daginn.
Ellen Kristjánsdóttir gleður okkur með tónlist.
Vinir í bata í Garðasókn bjóða upp á létta hressingu í safnaðarheimilinu að
Brekkuskógum 1, Álftanesi á eftir.
Það verður ný byrjun í Árbæjarkirkju í janúar 2019. Boðið verður upp á tólf spora starf mánuðina janúar til maí 2019 á miðvikudögum kl. 19.00-21.00. Fyrsti opni fundurinn verður miðvikudaginn 9. janúar, næsti opni fundurinn er 16. janúar og á fundinum 23. janúar verður hópnum lokað. Allir eru velkomnir og ekki þarf að skrá sig.
Margir segja að það besta sem þeir hafi nokkurn tíman gert fyrir sjálfa sig er að taka þátt í tólf spora starfinu af heilum hug.
Á uppskeruhátíðinni í vor var flutt ljóð sem fjallar um 12 sporin og er svo skemmtilegt að við deilum því hér með ykkur:
mitt_andlega_ferdalag_-_ljod.pdf
Það gleður ykkur örugglega að heyra að nú hefur bókin Bænir fyrir Tólf sporin verið endurprentuð og fæst hjá Kirkjuhúsinu. Margir hafa saknað hennar og geta nú keypt sér eintak og svo er hún líka upplögð í jólapakkann.
Ný og endurbætt vinnubók Tólf sporin – Andlegt ferðalag er tilbúin til afgreiðslu hjá Skálholtsútgáfunni/Kirkjuhúsinu.
Þangað er hægt að senda inn pantanir. Það eru talsverðar breytingar frá fyrri útgáfum, m.a. breyting á ritningargreinum, á textanum og tilfærsla á texta innan sporakaflanna. Það er ekki eins auðvelt að nota ólíkar útgáfur samhliða og verið hefur og ágætt að endurnýja. Bókin kostar kr. 3.500.
Hljóðbók: Nýja bókin er nú komin á hljóðbók á heimasíðunni www.hlusta.is.
Hægt er að skrá sig á póstlistann hér á síðunni til að fylgjast með þeim viðburðum sem eru og verða í gangi.
Vinir í bata er hópur fólks (karla og kvenna), sem tileinka sér Tólf sporin sem lífstíl.
Við höfum verið á okkar Andlega ferðalagi með öðru fólki og hvert með öðru og falið Guði að vera leiðsögumaðurinn. Við höfum fundið að vinna okkar í Tólf sporunum hefur leitt lækningu og bata inn í líf okkar og verið okkur andleg vakning. Þess vegna langar okkur til þess að þú fáir líka að reyna bata og eitthvað nýtt og gott inn í þitt líf og þínar aðstæður.
Upplifirðu stjórnleysi í lífi þínu og að þú ráðir ekki alltaf við aðstæður?
Hefurðu einhvern tíman velt því fyrir þér að þig langaði til og/eða þú þyrftir á því að halda að skoða lífið þitt – hvert þú stefnir – hverjar tilfinningar þínar eru og hvernig þú getur bætt samskipti þín við annað fólk?
Veistu að Tólf sporin eru kjörið verkfæri til þess arna. Við erum mörg sem getum vitnað um það af eigin reynslu. Okkur hafa borist nýjar reynslusögur.
Batamessan í janúar verður í Lágafellskirkju í Mosfellsbæ kl. 17.00 þann 13. janúar. Allir eru velkomnir í batamessu. Það er gott að byrja nýja árið með því að hitta aðra vini í bata í Batamessu.
Batamessurnar eru upprunnar hér á Íslandi.
Í batamessu sameina prestur og Vinir í bata krafta sína í viðkomandi kirkju og bjóða öðrum Vinum í bata til sín í messu, sem við köllum batamessu. Batamessurnar eru leið til að styðja við batann, vettvangur fyrir Vini í bata til að koma saman, hvort sem þeir eru búnir að fara sporin eða eru að vinna sporin, ekki síður en að átta sig á þvi að það er fólk víðar heldur en í þeirra kirkju/stað að kljást við sama verkefni.
Batamessur eru þarfur og mikilvægur liður í starfi Vina í bata og markmið þeirra er að styðja/ styrkja 12 spora iðkandann í því að viðhalda batanum. Allir geta komið og átt notalega og uppbyggilega stund í batamessu. Eftir messuna er boðið upp á létta hressingu, þar sem Vinir í bata geta sest niður og spjallað saman.
Samtals eru um átta batamessur haldnar yfir veturinn í mismunandi kirkjum á höfuðborgarsvæðinu.
Batamessurnar eru haldnar fyrsta sunnudag í mánuði klukkan 17.00.
Sjá má nánari stað og stund í viðburðadagatali Vina í bata hér til hliðar á síðunni.
Sjá ennfremur frétt um batamessurnar þar sem staðir og dagsetningar koma fram.
Það var kominn tími á nýja og flotta heimasíðu, svo við fengum snillingana frá Allra Átta til að setja upp glæsilega og snjallvæna vefsíðu. Allra Átta hefur smíðað marga flotta vefi og sérhæfa sig í vefsíðugerð, leitarvélabestun, wordpress vefhýsingu og allri almennri markaðssetningu á netinu.
Vefurinn keyrir á WordPress og sér Allra Átta um að hann sé í öruggri hýsingu.
Við þökkum fyrir nýja vefinn og vonum að hann þjóni núverandi og verðandi skátum með glæsibrag.
Vefur Allra Átta er hér: www.8.is
Nýlegar athugasemdir